خسرتني

فما عباد نخسروهم ، أيه من غير ما نبداو نكذبو على بعضنا و نقولو لا احنا ما نخسرو حد ! اما كيف ما فما عباد نخسروها ، فما عباد تخسرنا .. يقول القايل شكونك انت باش يخسروك ؟ أنا نقلك .. أنا اللي حبيتك من جواجيا ، اما اللي حلمت بيك و ما حكيتلكش ، أنا اللي كيف نراك من بعيد تغلبني الفرحة و نولي نرعش ، أنا اللي كيف تغزلي في عيني نولي ميتة ضحك خاطر ندخل بعضي ، أنا اللي كيف تحكي معايا وجهي يحمار و وذني اليسار تسخن ، أنا اللي دوب ما عرفتك ما كنتش نجم نهز عينيا فيك بالحشمة ، أنا اللي كيف نتوحشك عيني تدمع هاك الدمعة اللي تقعد معلقة باش ما تهبطش و تفضحني .. و تعرف علاه قلت تفضحني ؟ على اختر ما عنديش الحق نتوحشك .. على خاتر أنا و انت " اصحاب ".. على خاتر انت قتلي اللي أنا وياك ما نجمو نوصلو ل شي و أنا عملت روحي فاهمة و مقتنعة .. اما لا ، لاني فاهمة .. و لاني مقتنعة . و علاش باش نقتنع و أنا اللي عملت المستحيل باش تحبّني ؟ علاش باش نقتنع و أنا اللي ضحيت بكل شي تعرفو و ما نعرفوش على خاترك ؟ و علاه باش نقتنع و أنا اللي فلت الف فرصة باش نقعد معاك ؟ و علاش و علاش و علاش ؟ .. نكذب عليك نهار اللي سألتني : " وليت تحبّني ؟ " و أنا جاوبتك " تخيل ؟ هاك اللي مازال عليا " أيه أنا وقتها كذبت عليك و أنا واعدتك باش ما نكذبش.. أيه كذبت و شدِّيت غصتي في قلبي باش ما تبكيش و قلبتها ضحكة بليدة و ماسطة متاع وحدة تاعبة منك .. و ما فهمتنيش . و نبشرك يا انت ، ماكش باش تفهمي .. خاطر أنا حبيتك .. و انت اللي خسرتني. خسرت ضحكتي ، خسرت دمعتي ، خسرت صوتي اللي يلين كيف ينطق اسمك ، خسرت دقة قلبي اللي تزيد كيف ناراك ، خسرت بلادتي ، خسرت شطحتي و تنقيزتي ، خسرت حتى يدي اللي كانت ترعش كيف يشدها و تخليها في يدك و تبدا تغزرلها . خسرتني خاطر حبيتك ..