حبيتك ..

حبيتك .. ايه حبيتك باش نكذب عليك و نقلك لا ؟ حبيتك لين وليت نحس بغصة عمرك سمعت بحب يعمل غصة ؟ انا ما سمعتش .. انا عشت عشت تو مدة .. مدة مش فاهمة راسي من ساسي .. مدة مش فاهمة انا علاه و كيفاه .. مدة و انا نهار طايرة فالسما .. و نهار .... معفسة تحت الصباط . نهار نحس بيك متاعي ، و نهار لا نعرفك لا تعرفني .. كيف نشوفك .. آآآه من كيف نشوفك .. كيف نشوفك نموت . نموت و نحيا فالدقيقة الف مرة . آآه من هاكة العينين .. آآه يا .. اسمك ما نجمش نقولو .. حتى بيني و بين روحي نحشم . حبيتك ايه حبيتك .. و برشا زادة شكون هاكة ؟ هاكة ؟ هاكة أصحاب معاه . ايه اصحاب .. عادي معناها . نقولها و تشدني البكية مالداخل .. انا نعرف اللي محناش أصحاب .. و انت تعرف اللي ما نجموش نكونوا اصحاب .. اما ميسالش .. ميسالش نغطيو عين الشمس بالغربال .. و تعرف علاه انا قابلة اللي احنا " اصحاب " ؟ خاطر حبيتك .. و اللي يحب يضحي . ايه انا نضحي .. نضحي اما انا موجوعة .. برشا . نضحي يا .. هه اسمك يخليني نضحك .. مش نضحك خاطرني فرحانة .. اما يقولو كثر الهم يضحك . حبيتك .. و نعاودها و مش حاشمة منك . و كيفاش مش نحشم من عبد عشت معاه ضحكتي و بكيتي ؟ و كيفاش مش نحشم من عبد .. ما علينا اَي . حبيتك .. اما ما نعرفش كان مازلت نحبك .