خواطر ربروبة

انا كذابة . نكذب كان نقلك نسيتك نكذب كان نقلك نكرهك نكذب كان نقلك معادش نحملك ايه كذابة كذابة كيف قتلك ابعدني و معادش تدور بيا كذابة كيف نقلك سيبني معادش تحكي معايا اما خسارة .. خسارة تعبي فيك (كيما تقول اي أم و انا اعتبرتك ولدي اللي كيف يضحك نضحك و كان يبكي نموت مالداخل ) خسارة حبي ليك و وقتي اللي ضاع عليك خسارة ، مانيش نتحسر خاطرك مشيت راهو عادي كيما مشيت مشاو ما أعز منك على قلبي نتحسر خاطر هانت عليك العشرة نتحسر خاطر قبل ما تمشي قلت كلمة و ياليتك ما قلتها هي كلمة و ممكن قلتها و انت مش حاسبها اما ورأسك اللي يعز عليا هي كلمة بألف ضربة .. كلمة فسخت اللي قدامك و اللي قفاك في عيني كلمة خلاتك تطيييييييييح لبلاصة غارقة معادش نجم نشوفك فيها علاه ؟ مش كان سكت خيرلك ؟ ايه انا كذابة . كذابة كيف حبيتك .

نعشقك ، خاطر نشوف فيك روحي ايه نعشقك أكثر ملي نعشق روحي و تعرف علاه نعشقك ؟ نعشقك و ما لازمكش تستغرب مالكلمة نعشقك خاطرك انت نعشقك خاطر كيف نغزر في عينك نحس بروحي نحس بروحي عايشة نحس بروحي مزيانة نحس بروحي نتنفس نحس بروحي نحس نحس بروحي أقوى من روحي انت ، انت يا سر قوتي ، يا سر فرحتي ، يا سر ضحكتي نعشقك خاطر كيف نغزر في عينك نشوف روحي صغيرة نعشقك خاطر عمرك لا حسستني باللي انا كبرت و ممكن وليت قديمة نعشقك خاطر باللي نعمل فيك و نتعبك و نفددك تقعد تغزلي بنفس الغزرة متاع هاك المرة .. عرفتها هاك المرة ؟ هاكي المرة اللي شفتك فيها اول مرة هاكي المرة اللي كنّا نستخايلوها مش تكون اول مرة و آخر مرة كنّا نستخايلوها غزرة و تعدات ، ضحكة و تعدات ، شدة يد و تعدات .. اما تو نعرف حاجة برك .. نعرف اللي انا نعشقك على خاطرك انت

صباح الخير .. أمّا بعد ، اكتشفت مؤخرا اللي كل شي في هالدنيا يمشي خطوة خطوة ، حتى التعب و المشاكل تتراكم بشويا بشويا .. نحكي عالتعب النفسي ، التعب اللي يصيرلك في مخك و قلبك .. هاك التعب اللي يصير كيف انت كل مرة تتلقى صدمة أقوى من اختها ، ما نحكيش على حاجة محددة ، نحكي en général الصدمات هاكم يقعدو يتلمدو يتلمدو و انت بما انك إنسان عامل فيها ياسر قوي و ما تتقطعش تخليهم محبوسين الداخل و تقعد ديما تضحك و تتبسم بالرغم اللي ما فما شي يضحك معناها . الحاصيلو ، بخلاف الصدمات فما الكلام و المش كلام .. الكلام اللي يوجع و اللي في معظم الأحيان يكون في إطار تفدليك ، و المش كلام اللي نقصد بيه السكوت .. ماخيبو السكوت . السكوت هاكة اللي تبدى عينيك تغزر لعينين عبد و انت مالداخل تعيط ، و هو مازال يغزرلك و ساكت . و فما حاجة اخرى توجع اكثر منهم الكل .. عرفتوه هاكة الشعور اللي انت تبدى تعمل فيهم الكل و تحب في عبد و هو مش هنا جملة ؟ هاكي تقتل Bonne journée تو يلا

..ساعات توصل لوقت تحس فيه اللي حياتك زايدة و كيما وجودك كيما بلاش تحس اللي حد ماهو موجود لا باش يحس بيك و لا اصلا باش يفضي دقيقة و يحكي  معاك ..كانو برشا عباد دايرة بيك فجأة تلقى روحك وحدك و ما تعرفش علاه تنقم و تولي ديما على اعصابك و تنطش حتى على أقرب الناس ليك  ..تتسبب عل أقل حاجة  ..  على انت بيدك مش حامل روحك و كان مش عيب و حرام حال تعمل في روحك سبة و زيد عاد لا قراية لا خدمة لا مندبة الشي يولي دوبل تي وصلت خممت حتى كان تمرض و لا تصيرك حاجة حد ماهو باش يعرف خاطر ما تعني شي ل حد ...فراغ مالكلمة الباهية ، مالتعنيقة،  مالتبسيمة و الضحكة من القلب

.حِب اللي يلعب معاك ، يجري و يسيب هبالو .حِب اللي يضحكك و يغزرلك في عينيك و يعنقك حِب اللي حتى كان تقلو مش نطيش روحي يقلك أنا معاك خاطر يعرف اللي عمرك ما تغر بيه .حِب اللي تحس بروحك طفلة صغيرة معاه مش اللي يقلك ارزن .حِب اللي كيف تعنقو تنسى الدنيا و ما فيها .حِب اللي يسمعك و يقرى اَي حاجة تبعثهالو حتى و كان جريدة .حِب اللي يتلها بتفاصيلك اهم حاجة ، حِب المهبول اللي يستعرفلك اللي انت متاعو قدام الخلق و يطز عين الشمايتية ..مش اللي ماكش عارفة روحك شنيا تعنيلو ..حِب بركا

راك تستحق ما خير ! راك تستحق هاك العبد اللي كيف يقلك نحبك تحس بيها طول في قلبك راك تستحق اللي كيف يعنقك و يبوسك و حتى يمشي معاك لبعيد يغزلك ديما بعين كبيرة راك تستحق اللي يلعب معاك و يجري في جرتك عالبحر و يطيحك و يبرك عليك بالبوس و الحب راك تستحق اللي يسمعك و يسمع مشاكلك و دلولك و الضعف متاعك راك تستحق اللي يخلي راسو على صدرك و يتنهد و يرقد و في ضعفو يبكي عندك و انت تخبيه و تعطيه بااااارشا حب راك تستحق اللي تسبو و يسبك و تضربو و يدزك و بعد تعنقو بعضكم و تبكيو راك تستحق الحب ! الحب الحقاني اللي ما ينجمش يتخبى ! الحب اللي يخليك تقوم فرحاااااانة الصباح و اول ما تعمل ماذابك تسمع صوتو ! راك تستحق ما خير .. ببرشا

فما عباد نخسروهم ، أيه من غير ما نبداو نكذبو على بعضنا و نقولو لا احنا ما نخسرو حد ! اما كيف ما فما عباد نخسروها ، فما عباد تخسرنا .. يقول القايل شكونك انت باش يخسروك ؟ أنا نقلك .. أنا اللي حبيتك من جواجيا ، اما اللي حلمت بيك و ما حكيتلكش ، أنا اللي كيف نراك من بعيد تغلبني الفرحة و نولي نرعش ، أنا اللي كيف تغزلي في عيني نولي ميتة ضحك خاطر ندخل بعضي ، أنا اللي كيف تحكي معايا وجهي يحمار و وذني اليسار تسخن ، أنا اللي دوب ما عرفتك ما كنتش نجم نهز عينيا فيك بالحشمة ، أنا اللي كيف نتوحشك عيني تدمع هاك الدمعة اللي تقعد معلقة باش ما تهبطش و تفضحني .. و تعرف علاه قلت تفضحني ؟ على اختر ما عنديش الحق نتوحشك .. على خاتر أنا و انت " اصحاب ".. على خاتر انت قتلي اللي أنا وياك ما نجمو نوصلو ل شي و أنا عملت روحي فاهمة و مقتنعة .. اما لا ، لاني فاهمة .. و لاني مقتنعة . و علاش باش نقتنع و أنا اللي عملت المستحيل باش تحبّني ؟ علاش باش نقتنع و أنا اللي ضحيت بكل شي تعرفو و ما نعرفوش على خاترك ؟ و علاه باش نقتنع و أنا اللي فلت الف فرصة باش نقعد معاك ؟ و علاش و علاش و علاش ؟ .. نكذب عليك...